Den partido di Evelyn Wever Croes nunca Dangui Oduber lo haya stoel grandi pa sinta

Despues di fayecimento di e fundador y lider di partido MEP, Betico Croes, tabata Nelson Orlando Oduber kende a tuma un partido over, cu tabata para dilanti cantidad di reto, esun mas grandi su problemanan financiero.

Sinembargo Nel Oduber a traha duro, a enfrenta retonan grandi y sin keha a soluciona esakinan y a converti MEP den un partido sano financieramente recuperando di un periodo malisimo.

Awor cu Nel Oduber a bira lider honorario di MEP, e tabata orguyoso sin duda pa mira su yiu homber Dangui Oduber scoge mesun rumbo politico cu su persona y cu e logranan di su yiu, Nel a sinti su mes sumamente orguyoso.

Sinembargo den e proceso electoral di diabierna ultimo, algo a cambia, algo a cambio ora cu algo a bay robes, algo cu hopi hende no por a kere y cu awe ocho dia despues di eleccion, ainda ta wordo comenta tur caminda rond di e isla.

Dangui Oduber a bay atras den voto personal cu a bira e sorpresa mas grandi di eleccion 2021 ya cu tur expectativa tabata cu e yiu di Nel supera hasta e lider di partido Evelyn Wever Croes, pero na final di dia, no a resulta di t’e caso.

Den propio seno di e partido geel, pero mas ainda den seno di Dangui Oduber, dudanan a lanta cabes, cuestionando e resultado y mientras cu ta positivo cu MEP a bira e partido ganador di eleccion cu 9 asiento, e resultado a bira mescos c’un derota pa Dangui Oduber.

Mustrando su disgusto y desapunto, e Team di Dangui a cuminsa na kita tur loke ta propaganda politico for di caminda publico.

Mirando e campaña cu el a core, mirando e cantidad di auto rond Aruba cu sticker riba windshield cu Dangui su nomber, tur hende a spera cu e yiu di Nel Oduber lo a supera e barera di 5 mil voto, pero esaki no a resulta.

Inexplicablemente Dangui Oduber e mira su cantidad di votonan cay na lugar di subi y tur hende  a keda cu e pregunta di: “ta kico a pasa,” ya cu realmente e resultado di diabierna anochi, sin duda no tabata algo cu ningun miembro di e team di Dangui a spera  haya.

AWEMainta ayera a wordo confirma cu  e decepcion ta grandi, caminda ningun hende por splica con Dangui a bay atras den voto y lider di e partido Evelyn Wever Croes a mira su cantidad di voto aumenta barbaramente.

Den e situacion aki, hopi t’esnan cu a interpreta un expresion di e tata di Dangui, esta Nelson Oduber den fin di siman riba facebook, como e prueba grandi cu ta reinando den seno di e campañadornan di Dangui, ora cu el a bisa: “Done and Gone,” cu otro palabra ta basta!

Awor dilanti di otro posibel periodo como gobernante por a scucha algun hende di Dangui papia riba e rol cu e politico lo tin cu hunga den proximo periodo di gobernacion, ya cu hopi ta kere cu bou di e circunstancianan cu a surgi cu resultado e voto personal, kisas ta mihor Dangui bay bek Parlamento y for di eynan trata bek na su imagen, traha pa consilida su futuro politico.

AWEMainta a ricibi un reaccion di un hende cu a campaña pa Dangui, kende a keda incomodo cu loke a pasa y a bisa: “Den partido di Evelyn Wever Croes, nunca Dangui lo haya stoel grandi pa sinta.” Cu otro palabra cu te na ora cu MEP ta wordo dirigi pa Evelyn, un yiu di Nel lo no ser permiti pa hunga un rol mas grandi cu e propio lider di e partdo geel.