Koki deteni un biaha mas pa ladronicia di sapato

Diahuebs mey anochi varios unidad di diferente districto a wordo manda direccion Rococo Plaza situa na Tanki Leendert. Eynan of eybanda algun persona tabata tras di un ladron.

Den algun minuut Polis a yega y ariba e caminda dilanti Rococo Plaza cu ta bay pa Nuña a bin topa e habitantenan cu e ladron.

Mesora Polis a reconoce e persona, tabata trata di Elton Kock tambe conoci bou e nomber Koki.

E homber aki ta un adicto y na multiple ocasion el a worda deteni p’e mesun hechonan, esta ladronicia.

Elton lo a horta sapato di un persona. Momento cu e persona a haya falta di su sapatonan cu e ta laga pafo el a subi auto y a core den becindario y a bin topa Elton/Koki cu e sapatonan. Esaki despues cu e alarma den su cura a bay on.

Aki a start un persecusion cortico na pia unda cu e habitantenan a logra gare y wante te ora Polis yega.

Elton tin problema di droga y tabata sera na KIA pa basta luna. Un luna y mey pasa mas o menos el a sali di KIA, y esnan cu conoce poco poco por a mira ta bay atras atrobe den e mundo di droga cu ta coste su libertdad.

No ta conoci si e lo bay KIA bek, cu Elton mester ayudo ta un hecho, el a yega di papia esaki dilanti camara. Pero, e mester sali di su mes un will power p’e logra esaki.

P.e. e lo por busca ayudo serca sr. Frans di Stichting Eliezer Zorgboerderij La Posada situa na Paradera. Eynan e lo wordo bon guia pa personanan cu amplio experiencia.