Radisson Blu awor oficialmente afilia na fondo di pensioen PFTSA

Pension Fund Tourism Aruba [PFTSA] recientemente a añadi Radisson Blu na nan rooster di cliente. PFTSA su meta ta pa bira e escogencia number uno pa empleado y dunadornan di trabao den sector turistico pa loke ta ehecucion di nan plan di pension na Aruba.
Manera conoci, nos isla a yama bon bini na Radisson Blu Aruba, un tremendo resort nobo cu a habri na Palm Beach cual ta ofrece 133 suites di dos of tres kamber, cu areanan  separa y cushina completamente ekipa.

PFTSA ta orguyoso di por anuncia cu nan a caba di firma un acuerdo cu Radisson Blu Aruba ofreciendo nan tremendo beneficionan.  For di momento cu PFTSA a wordo acerca, a responde di biaha n’e peticion y asina e proceso a cuminsa. Tabatin contacto continuo p’asina na final Radisson Blu a haci su escogencia pa afilia na PFTSA.

Radisson Blu ta un compania cu a caba di establece su mes na Aruba recientemente pues pa PFTSA e ta un honor di por tin Radisson Blu como un afiliado n’e rooster di PFTSA.

Institucion financiero completamente Arubano
PFTSA ta un institucion completamente Arubano, operacional desde 1992. E institucion aki a wordo funda pa motibo cu FTA y AHATA e tempo ey tabata kier p’e trahadornan di sector hotelero tin un extra entrada ora cu nan baha cu pension, aparte di e entrada di SVB.

Ta importante tambe pa tuma nota cu companianan di sector turistico por join e fondo aki, cual ta un sector hopi ampleo conforme e lista di CBS. E beneficionan cu ta wordo ofreci ta hopi atractivo, entre otro: Transparencia total, “open door policy”, relato anual di pensioen digitalmente, participacion activo na asamblea general anualmente, aceso na cualkier momento na estado di spar por medio di website of aplicacion di smartphone.

Como tambe e opcion pa haci prestamo hipotecario pa un cas of remodelacion atrabez di e fondo di PFTSA. 

PFTSA ta un fondo cu ainda ta creciendo, den e cantidad di miembro, producto y servicionan cu nan ta ofrece cu aumento den rekesito reglamentario, ganando e confiansa di su clientenan y nos comunidad. Pa mas informacion na con por afilia na PFTSA, por tuma contacto libremente via info@pftsa.com of 582-4499