Raymond Knops ta yega pa haya mesun partido MEP sin begroting 2021 aproba

Dentro di algun dia, esta dialuna awor Secretario di Estado pa Asunto di Reino, Raymond Knops, lo ta di bishita na Aruba y mientras cu kisas el a spera di haya un otro Gobierno na mando, Knops lo bolbe topa cu mesun partido MEP y su lider Evelyn Wever Croes na cabes.

Si enberdad den e dianan aki partido MEP anuncia su Gobierno di coalicion cu partido RAIZ, Knops lo realisa cu mucho no a cambia, solamente e dos partido chikito cu tabata compañero di MEP den e Gobierno anterior, awor ta topa otro partido chikito cu otro cara, pero mesun situacion.

No solamente e mesun situacion politico, pero tambe gubernamental ya cu Knops ta yega sin por haya e presupuesto 2021 aproba, algo cu Gabinete Wever Croes a sigura Knops cu e lo wordo aproba for di prome di februari, despues prome di maart, pero pa fin di maart ya no tabatin Gobierno.

Na mes momento ya caba ta wordo anticipa cu Knops den representacion di Gobierno Hulandes, ta bin pa mira con ta bayendo cu ehecucion di loke a wordo palabra cu Evelyn Wever Croes den su calidad di Prome Minister di e pais.

Pa loke ta trahadornan publico, ya caba mester tabatin un investigacion andando riba trahadornan publico, riba nan forma di funciona, nan interes den nan funcionamento y cuento hende ta cobrando si traha.

Aparentemente e raport aki mester ta cla caba y Raymond Knops ta bin Aruba pa mira con ta bayendo cu e proceso aki y pa mira si lo cumpli cu e fechanan stipula den e acuerdo firma p’e lider di MEP.

Un di e puntonan cu ta wordo yama den a acuerdo: Kosten en effectiviteit publieke sector” lo ta bin pa tur trahado publico realisa cu tin medida na caminda y nan tin cu ser ehecuta.

BENEFICIONAN

Un di e puntonan cu ta punto B-5 ta para lo siguiente y cu pa dia prome di october mester wordo implementa mas tarda: “Op basis van onderzoek naar de primaire, secundaire en tertiaire arbeidsvoorwaarden (waaronder overwerkvergoedingen, verlofregelingen, bijzondere beloningen en toeslagen, reizen en reisvergoedingen, etc.) worden voorstellen voor mogelijke versobering ontwikkeld en geïmplementeerd.”

Pues ta papiando di versobering di beneficionan secundario manera AWEMainta ya caba a publica recientemente riba e particularidad aki, pues e  lo bay reduci cantidad di beneficionan secundario di trahadornan publico.

EFECTIVIDAD Y RETIRO

Otro punto cu AWEMainta tambe a publica algun siman atras, ta cu a base di e investigacion cu ya ta andando caba manera Knops a informa Tweede Kamer, tambe lo bay over na investiga cua trahadornan publico ta cumpli cu nan funcionamento ya cu lo no paga salario mas n’esnan cu no ta traha of no ta presta drechi den nan funcion y esaki mester ta implementa no mas tarda cu dia 15 di december proximo, loke ta indica cu algun trahador publico lo por wordo manda cas den luna di december.

“In het kader van een optimale personele inzet wordt de formatie, bezetting en daadwerkelijke aanwezigheid en inzetbaarheid van medewerkers van overheid en overheidsorganisaties onderzocht. Indien medewerkers onterecht loon ontvangen worden, afhankelijk van de situatie, maatregelen getroffen (o.a. stopzetten salaris, ontslagtraject).”

Palabra cla di Knops, mustrando cu kedamento di cas y bin cobra tur fin di luna, ta bay caba aki na Aruba.

Apenas esaki t’e medidanan relaciona cu e aparato publico caminda lo tin cu manda trahadornan cas, sigur esnan cu no a bin ta funcionando manera mester ta of loke e líder di MAS, Marisol Lopez Tromp a cataloga como “spirito.”