Sra. mr. Monica Kock y dr. mr. Rosslin Marchena apunta como Presidente y Presidente suplente di Conseho Electoral di Aruba

Presidente, sra. mr. Eunice A. Saleh, di Corte Comun di Husticia di Aruba, Curacao, Sint Maarten y di Bonaire, Sint Eustatius y Saba ta anuncia cu entrante 17 juli 2021, sra. mr. Monica Helena Johanna Kock, ta apunta como Presidente di Conseho Electoral di Aruba a base di un beschikking cu tin fecha 1 di juli 2021.

E Vice-Presidente di Algemene Rekenkamer Aruba, sr. mr. Frederick Nuboer, CAMS, ta anuncia cu entrante 17 di juli 2021, sr. mr. Rosslin Marchena ta apunta como Presidente suplente di Conseho Electoral di Aruba a base di un beschikking cu tin fecha 1 di juli 2021.

Conforme articulo 5, paragraf 2, di Landsverordening politieke partijen (AB 2001 no.96) e nombramento di Presidente y Presidente suplente di Conseho Electoral di Aruba, ta wordo apunta dor di e Presidente di Corte Comum di Husticia y dor di e Presidente di Algemene Rekenkamer Aruba.

Teniendo na cuenta cu e nombramento, di sr. mr. dr. Glenn Albert Edward Thodé y sr. mr. ing. Hubert Cirilo Maduro, e actual Presidente y Presidente suplente, ta limita na un periodo di 4 aña y cu esaki lo caba dia 16 di juli 2021, ta necesario pa apunta candidatonan nobo pa dicho funcionnan.   

Despues di consulta intensivo, sra. Kock y sr. Marchena tabata dispuesto pa tuma e puestonan di Presidente y Presidente suplente na nan encargo.

Presidente di Corte Comun di Husticia y e Vice-Presidente di Algemene Rekenkamer Aruba ta desea sra. Kock y sr. Marchena tur clase di exito pa loke ta trata nan funcion nobo. Na mes momento ta gradici sres. Thodé y Maduro pa nan compromiso y experiencia pa por a fungi den e puestonan durante e ultimo 4 añanan. Ayera mainta sr. Nuboer a ricibi bishita di sr. Maduro na oficina di Algemene Rekenkamer Aruba pa por a gradici’e personalmente.