Falta caminda legal pa votador cana pa haci reclamo di iregularidadnan den eleccion

Nunca prome nos pais a conoce un eleccion cu asina hopi reclamo di votadornan, di controladornan di votacion y di miembronan di e urnanan electoral cu a maneha e votacion den e urnanan, pa iregularidadnan prome y durante di eleccion, pa decisionnan y actonan contra ley di eleccion, manera e eleccion di 25 di juni 2021.

Awe, shete dia despues di e eleccion ainda tin reclamonan ta drenta. Awe a drenta un reclamo di un señora cu a traha na un urna y ta bisa cu a kita mas cu 20 voto di un partido den e conteo di Conseho Electoral. Tin hopi ciudadano cu ta dispuesto pa haci declaracionnan formal di iregularidadnan y pone nan firma bou didje!

Ayera Conseho Electoral a publica nan decicionnan riba e eleccion den “proces verbalnan”.

E reclamonan di ciudadanonan votador ta contradeci loke ta para den e “proces verbalnan” aki, pero ta parse cu no tin caminda legal pa cana pa exigi husticia.

IREGULARIDAD Y TAPAMENTO DI IREGULARIDAD

E lista di iregularidadnan cu Gobierno y CENSO a comete prome cu dia di eleccion y e cantidad di reclamo di ireglaridadnan riba dia di eleccion ta sigui aumenta. Di votadornan na Savaneta cu e hala atencion di e Presidente di un urna, pasobra nan a wak un hende vota cinco biaha pa ancianonan den rolstoel cu no por a ni papia. Reclamonan di candidatonan di diferente partido cu a vota pa nan mes y no a haya niun voto den e urna ey.

Checkernan cu a mustra e Presidente di e urna cu tin hende ta sali di un hoki pa vota y drenta e otro, mientras tin otro hende ta vota. Conteo di voto n’e urnanan cu ta diferencia hopi di e conteo cu Conseho Electoral a publica.

Den cualkier pais cu ta biba bou orden di su leynan (=estado di derecho), mester tin caminda pa cana pa exigi coreccion di erornan. Den e eleccion di siman pasa a resulta cu aki na Aruba e instancianan cu mester defende nos leynan y atende cu kehonan, ta tapa e iregularidadnan cu votadornan di mayoria di partidonan a y ta sigui señala. Despues cu a resulta cu Conseho Electoral a NENGA tur reclamo di e partidonan, votadornan a haya nan confronta cu un porta sera na MInisterio Publico cu a laga sa cu nan no ta tuma niun reclamo di ciudadanonan cu tin di haci cu hortamento di eleccion di siman pasa.

E unico caminda cu a parce di ta habri ta Corte di Husticia. Pero di diferente abogado a drenta e conseho cu Corte di Husticia tambe lo nenga cualkier reclamo di ciudadanonan cu e argumento cu Corte di Husticia no ta bay sinta riba e stoel di Conseho Electoral.

Cu esaki, Pueblo di Aruba ta keda sin niun caminda pa cana pa exigi husticia den eleccion cu a wordo obviamente horta!

CASO DEN CORTE 

Ora un ciudadano na Aruba ta haya cu a comete un inhusticia contra dje, e ta pensa mesora riba Corte di Husticia pa busca rason y hustica. Mescos a sosode e siman aki, ora pueblo a wak con despues di tanto intento di Gobierno pa influencia e resultado di eleccion den nan fabor y tanto reclamo di votadornan pa cosnan cu a sosode riba dia di eleccion, Conseho Electoral a nenga tur reclamo di pueblo votador. A nenga di laga votadornan drenta e reunion di Conseho Electoral manera ley ta prescribi y a rechasa e peticion di mas cu 3 mil votador pa conta votonan di nobo. Un di e personanan cu mesora e bisa cu e lo bay cuminsa un caso contra Presidente di Conseho Electoral, pasobra a nengu’e di drenta e sala, tabata Rene Herdé.

Un dia prome cu e reunion di Conseho Electoral el a manda un carta pa Presidente di Conseho Electoral pa mustra cu e reunion mester ta habri pa publico. Diamars mainta el a bay Censo como votador y a pidi pa drenta e sala di renion. Ora el a wordo nenga entrada el a bisa cu e lo cuminsa un caso contra Presidente di Conseho Electoral pa cumpli cu ley y laga votadornan drenta. Sinembargo su abogado a bise un rato despues cu no tabata bal la pena cuminsa e caso, pasobra pa ora cu e peticion p’e caso yega Corte, ya e reunion di Conseho Electoral lo a caba. Y en berdad, den apenas un ora y mey e reunion a caba.

FALTA DI INSTRUMENTONAN LEGAL Aunke tin hopi hende cu reclamo y denuncianan di iregularidadnan den eleccion di siman pasa, ta resulta cu nan no tin caminda legal pa cana pa wordo scucha of haya husticia. Esaki ta un fayo serio den nos sistema legal. Pa un pais cu ta considera su mes un pais basa riba leynan, esaki ta inaceptabel y mester wordo drech’a mas liher posibel.