Falta di respet di Conseho Electoral ta crea tension pa posibel manifestacion

Bishita di Secretario di Estado Raymond Knops otro siman na Aruba, lo por t’e momento ideal pa un manifestacion tuma lugar contra desaroyonan incorecto cu lo a tuma lugar durante di e proceso electoral di siman pasa.

Partido AVP e siman aki a trata di haya un reconteo di sikiera pa loke ta trata votonan invalido, pero  mientrastanto despues di e posicion iritante di Presidente di e Conseho Electoral, Glenn Thode diaranson ultimo, AWEMainta a haya informacion di varios partido politico cu a reuni riba e particularidad di resultado di eleccion caminda tin hopi duda riba e resultado final.

Tin reunionnan tumando lugar y kisas e fin di siman aki tambe lo tin un of mas partido cu lo reuni pa mira ki caminda nan por cana despues cu nan tambe a haya reclamo di votonan cu a wordo deposita na urnanan rond di e isla, pero cu no ta refleha bek den e resultado emiti pa Censo.

E forma con Conseho Electoral ta nenga di haci un esfuerso pa alivia e duda cu ta sigui crece den ultimo dianan, principalmente e forma con ta sigui dilanti mescos cu pueblo no tin bos y ni derecho, anunciando Presidente y Vice Presidente nobo mescos cu tur cos ta normal, ta causando un iritacion inmenso.

Den ultimo dianan ta tur caminda cu yega, por scucha hendenan papiando di resultado di eleccion, hendenan cuestionando cu nan a vota na tal caminda, pero no ta mira esaki refleha bek den resultado, caminda e forma con Gobierno y Censo a practicamente elimina e rol di chequersnan, ta lanta e pensamento riba un posibel complot formal.

Hasta den seno di sostenedonan di Dangui Oduber por scucha mesun tipo di reaccion aki y a cu pa nan, cu a duna asina hopi pa nan candidato crece, ta mira un resultado decepcionante den nan propio partido.

Mas y mas partidonan politico cu a participa den e proceso electoral, a cuminsa analisa e resultado di diabierna siman pasa y ta haya cosnan cu no ta normal,  cu nunca a pasa den un proceso electoral aki na Aruba.

“Manifestacion, ban manifesta,” ta un grito cu a cuminsa lanta cabes for di diaranson despues cu Conseho Electoral a nenga di acepta miles di firma di ciudadanonan cu ta pidi un reconteo y den curso di ayera hopi reaccion a drenta y por a wordo scucha riba un manifestacion grandi. Si esaki bira realidad otro siman, caminda votadornan disgusta kier mira nan protesta wordo scucha y atendi, esaki lo por cay net na momento cu Secretario di Estado Raymond Knops ta di bishita na Aruba.