Cuatro compania di Citgo na Aruba oficialmente elimina

Gobierno saliente a yega na un acuerdo cu CITGO pa sera nan capitulo aki na Aruba. Un final cu, según varios politico, e único cu a sali perdi tabata Aruba. Esaki pasobra tabatin bon base cu nan mester a paga Aruba un suma grandi di placa.

Hopi cuestiona e decisión aki di Gobierno, pa motibo cu e empresa madre no tabatin problema. Y por  sigui mantene nan mes n’e contracto, cu a nifica entrada di placa pa Aruba. Loke na final di cuenta a haya, no ta nada comparabel cu e suma final cu lo mester a haya.  

E compania CITGO no ta estableci na Venezuela sino na Merca y ta un filial Mericano di e compania estatal Petróleos de Venezuela S.A (Pdvsa). Despues di e acuerdo cu Aruba, mester a cana un proceso y finalmente a disolve cuatro empresa registra na Aruba. Tabata trata di companianan cu nan tabatin mester pa remodela e refineria na San Nicolas.

Citgo Aruba Holding (CAH), un subsidiario di PdV Holding cu base na e ciudad di Delaware, Estados Unidos, a likida oficialmente Citgo Aruba Terminal NV, Citgo Aruba Marine Operations NV, Citgo Aruba Supply NV y e entidad independiente Citgo Aruba Thrift Foundation.

Sinembargo, Citgo Aruba Refining (CAR), otro subsidiario di CAH, a keda activo. E decisión aki a bira oficialmente na momento cu el a keda publica den Landscourant. Manera por corda, e cuatro companianan ariba menciona a establece na Aruba na aña 2016, ora cu PdVsa a firma un contrato di lease pa rehabilita e refineria na San Nicolas, cu den su ultimo operación tabata produci 235 mil bari diariamente.

E intención tabata pa uza e petroli extra pisa di Orinoco den un petroli mas sintetivo, mas liher. Masha poco refineria na mundo por haci e proceso aki. P’e motibo aki e refineria di San Nicolas tabata asina importante pa Citgo. Despues di e acuerdo pa tuma e refineria bek, Gobierno a informa cu tin varios compania interesa pa tuma e refineria. A priminti di tuma un decisión hopi liher riba destino di e área aki. A hiba un proceso unda dos compania, cu no t’asina conoce mundialmente, a yega na un MoU cu Gobierno di Aruba.

Riba diahuebs, 14 di januari 2021 a tuma lugar e firmamento di acuerdo “Letter of Exclusivity” entre RdA y Eagle LNG pa desaroya un facilidad di gas na Aruba/San Nicolas.

Sean Lalani , Presidente Eagle LNG a firma acuerdo di exclusividad pa desaroya un facilidad di gas na Aruba. Na december, 2019, e companianan Eagle LNG y Quanten LLC a firma cu RdA pa sigui cu negociacionnan p’asina mira si ta yega na acuerdonan pa Quanten LLC di su banda traha riba e reapertura di e refineria y Eagle LNG riba un proceso/desaroyo nobo.

Net prome cu Gobierno a cay, Prome Minister a hasta papia di un decisión defitivo den dos siman di tempo. Pero e periodo aki a pasa y te awor no a tende nada mas.