Duke Croes den un Xpresa bo Mes: Aruba, kico awor

E realidad amargo  cu pueblo di Aruba tin cu biba por lo pronto cune ta cu e eleccion di 25 di juni 2021 a gana un galardon di t’e unico eleccion FRAUDULENTO den historia di Aruba sigur desde 1948/1949. O sea cu pa mas di 70 aña di nos Arubianonan y Aruba den mundo tabata wordo admira como un di mas honesto, drechi y democratico.

Lamentablemente e situacion doloroso y humiyante desde eleccion ultimo a haci cu e Arubianonan a wordo te den su entraña cruelmente afecta. Y esaki no tin nada di haber cu un of otro partido grandi o chikito ta HAMBRA pa drenta Gobierno. Ta di spera cu poder di DIOS  cu un partido manera AVP, despues di e ultimo desaroyonan no ni tribi di pensa di bay forma un mayoria cu cierto partido chikito cu ya a demostra di ta traiccionero y no-digno di nan votadornan. Ta di spera cu e pueblo realisa e sushedad cu a pasa cu e ultimo eleccion. Pueblo merece mihor. No solamente den e campo di bataya politico conoci di Gobierno/MEP versus e otro resto di pueblo y partidonan na Aruba democracia a wordo brutalmente benta den riool. Ningun alma normal no por keda sin mira e fraude di votonan cu a wordo cometi den diferente forma. 

Apesar cu primordialmente ta un asunto interno di un partido (un dia y un tempo) prestigioso manera MEP , cu mi tin hopi respet pe, e diferente candidatonan a acepta y resigna nan mes  sin mas na un forma totalmente duduso n’e cantidad di votonan personal. Awor DOOR cu tur e otro candidatonan cu wordo desprestigia y humiya a guli e abuso aki y a opta manera un pilin di acepta e fraude di votonan aki, Aruba  lo mester asumi cu pa nan  tur cos  ta ok. O sea tanto e candidatonan y  votadornan di MEP. Pero HAMAS no por t’asina cu pueblo mester acepta loke a ser haci cu un prospecto grandi den politica y otronan, manera un Dangui Oduber na Aruba.

Pesey e ta keda algo increibel con un respectuoso estadista grandi di taya manera Nel Oduber, kende admirablemente a profila su mes y cu tur derecho sosteniendo su yiu, mirando e cualidadnan di su heredero, cu tur respet, POR ta acepta e fraude di voto interno aki  den su partido sin mas. Pero atrobe e ta keda e legitimo derecho y asunto interno di cada ken y partido pa atende cu posible asuntonan pa cu cualkier ser humano no a bay normal.

Pero e asunto interno di partido asina importante pa Aruba mester wordo mira den contexto mas grandi, O sea cu ta riba tur nivel Gobierna/Liderazgo di MEP den un forma SISTEMATICO a MASACRA e eleccion di pueblo. (Sorry, semehante cu e meta nazi pa cu extermina democracia ( y hudiunan), e proposito na Aruba pa cu  eleccion  di juni 2021 ultimo tabata exterminacion (uitroeiing) di nos democracia/estado di dercho.)                                                                                                                                       

Lagando e posible panorama cu ta partido AVP. SO ta denunciando e miserabel FRAUDE aki den e eleccion y e resultado, tur alma na ARUBA, REINO, Y MUNDO, mester por a compronde cu ta partidonan cu ta representa un mayoria absoluto di PUEBLO ta denunciando FRAUDE Y CORUPCION di proceso electoral. E NO ta asunto di un egoismo o mal perdedor di AVP so. Ban ta serio y honesto si. Di un forma cu no ta laga NINGUN duda ACCION 21, MAS, PPA, HTC. PUEBLO PROME, y AVP. entre otro a exigi un reconteo di votonan di e eleccion di 25 di juni.

SHONNAN nos ta papiando di ± 30.000  di votonan contra ±26.000  di MEP Y RAIZ. Mi kier sa cua hende normal riba e pida baranca Aruba aki ta bin bisa cu esaki no ta mayoria absoluto di pueblo y ta hustifica  un reconteo. Pero a base di instruccionnan y su obediëncia na su amonan, e Presidente di Conseho Electoral di un forma dictatorial Glenn Thode, alias LUKASHENKO, a dicidi cu NOOOO. Esaki ta prome biaha den historia di eleccionnan na Aruba un reconteo a wordo “ OBSTRUI”.

Aruba tabatin cu PPA, AVP, MEP (esun drechi). cu semper cu orguyo tabatin eleccionnan honesto y limpi na nomber di e henter e pueblio caminda si tabata desea o necesario a haci reconteo. Pero tambe eleccionnan legitimo.                                                                                                                                                      

E pregunta e ora ta, AWOR KICO. “Ta mas cu cla cu mayoria di e pueblo aki lo sinti cu si nan no haci nada nan lo ta traccionando nan patria. Pasobra HAMAS mester laga cu FRAUDE Y CORUPCION electoral lo ta daña e nomber y reputacion di nos pais internacionalmente. Den e mundo cibernetico di awe ya caba mundo sa di e FRAUDE di e eleccion recien. Kico esaki lo kiermen pa nos turismo awor cu Aruba a bira un Republica di Banana pa loke ta eleccion, Parlamento y Gobierno.  Paisanonan stima, por fabor, no onderschat e mal nomber aki.                                                                                                                                                                                   Miranda e forma dictatorial  cu Conseho Electoral, Gobierno di Aruba/MEP, Censo di Aruba, individuonan cumpra y maligno, y hasta partidonan politiconan chikito/nobo politicamentie vies/sin credilidad mas, e.o ., e opcion ta doloroso. Si tur medio na Aruba a caba, ban como pueblo denuncia e barbarida- y atrocidadnan aki contra e abuso di poder aki. Si e no wordo para ningun hende tin e derecho di lamenta y reclama mañan.

Henter e preparacion, organisacion y realisacion di e eleccion cual nan a cuminsa hopi tempran, ta totalmente empugna tanto pa Aruba y internacionalmente contra e exigencianan minimo di un Estado di DERECHO y DEMOCRACIA.  

Kiermen cu e Estado di Derecho di ARUBA  a  wordo mina ferazmente. Di esey no por tin duda. Pero den STATUUT, REINO HULANDES (HULANDA) ta absolutamente responsabel pa garantisa cu na Aruba tin un estado di derecho. Esey kiermen entre otro cu democracia ta sagrado pa Aruba. Y ta sigur cu si Hulanda tin un debilidad ta ora cu e wordo internacionalmente wordo denuncia di ta trapando y ta conspirando cu fraude electoral y democracia den su propio Reino.   Mirando e FRAUDE bisto den e ultimo eleccion ta OBLIGASHON di ARUBA, como HENDE DRECHI y PA AMOR PATRIO, di denuncia e abuso electoral aki sin miedo, y amor patrio INTERNACIONALMENTE. Henter PUEBLO di ARUBA, y NO AVP, SO.  Mester denuncia e FRAUDE ELECTORAL aki na STATE DEPARTEMENT WASHINGTON (caminda Aruba tin hopi amigo n’e momentonan aki), STATEN-GENERAAL DER NEDERLANDEN, EUROPEES PARLEMENT EN COMMISSIE, RIJKSMINISTERRAAD, RAAD van STATE, Parlement ARUBA, Parlement Curaçao/Sint Maarten, EILANDSRADEN BONAIRE, SABA, STATIA, PARLATINO, Carter Foundaition, COPPPAL, etc, etc.. No ta cuestion di un partido politico cu ta den wega aki. E ta nos dushi PAIS, cu ta wordu afecta den un di cosnan cu ta Sagrado pa un Pueblo. O sea e orguyo cu ta Arubiana y den henter mundo wordo mira como honesto. No ta bay pa poder ni contricancia,  ta bay pa semper por ta orguyoso y cu frenta na halto mustra cu nos Arubiano y Aruba ta DRECHI y dor di esey cu tur humildad mester wordo RESPETA.