Interes grandi pa prome evento di Comerciantenan Uni Aruba

Un grupo grandi di comerciantenan a asisti diaranson 30 di juni ultimo n’e prome Businesss Networking Event organisa pa Comerciantenan Uni Aruba (CUA). E encuentro a tuma lugar n’e espacio paden y pafo di Harbour House den centro di Playa den oranan di atardi pa anochi.

Esnan presente a expresa di a keda masha satisfecho cu loke a wak y scucha; tanto for di e directiva di CUA, como tambe di e orador invita. Fuera di sinti cu e gremio lo tin un bon representacion di nan interesnan, tambe por a conoce detayenan interesante di e proyecto Gateway 2030 di AAA N.V. y papia cu otro comerciantenan.

A hiba palabra sr. Francis Saladin Jr. kende hunto cu e actual Presidente sr. Frans Ponson ademas di sr. Randall Croes, ta forma e directiva actual. Mientras cu Saladin a papia di e motibonan pakico CUA  a nace, Ponson a elabora riba e aplicacion mobil cu tur presente por a download n’e momento ey y con e organisacion ta bay haci uzo di dje pa mantene un contacto y comunicacion estrecho cu nan miembronan.

Un di e propositonan di e app ta pa dialoga riba topiconan di interes actual y yena na posicion di CUA den diferente aspecto di un manera democratico y sin ‘red tape’. 

Di su parti, sr. Randall Croes a trece dilanti algun di e temanan importante y pendiente pa trata manera Landspakket, reforma fiscal y leynan laboral, entre otro.

Como prome orador na un evento di CUA, a invita sr. Shensley Tromp, kende ta gerente di desaroyo y IT pa Aeropuerto na Aruba Airport Authority N.V. El a duna un presentacion concentra di loke t’e prome fase di e proyecto Gateway 2030 y kico por bay spera t’e cambionan positivo den e experiencia p’e usuarionan.

Otro punto resaltante di su presentacion y di e anochi riba su mes t’e anuncio cu AAA N.V. hunto cu otro aeropuertonan di Caribe Hulandes a sera un aliansa y ta trahando riba un proyecto di aviacion electrico cu lo por revoluciona e trafico aereo regional cu pasashi entre islanan ABC y St. Maarten pa prijsnan sumamente economico. Esaki na su lugar, por fomenta hopi e relacionnan comercial entre e diferente islanan. Sigur un anochi masha agradabel caminda representantenan di companianan chikito, mediano y grandi por a disfruta di un ocasion agradabel despues di hopi tempo y acontecimentonan tras di lomba, pero tambe pa pensa hunto riba e posibilidadnan cu futuro ta trece dilanti. Comerciantenan Uni Aruba a gradici Harbour House, Aruba Trading Company, Elite y Verbum Works pa nan contribucion na e realisacion exitoso di e evento. Pa mas informacion di CUA, e aplicacion online y plannan pa futuro, ta invita pa sigui e pagina di CUA riba Facebook na: https://www.facebook.com/comerciantenanuniaruba