Selebrashon buelo inougural di Jetair ruta Kòrsou – Jamaica

WILLEMSTAD – Den un ambiente ameno na Aeropuerto Internashonal Hato a tuma lugar selebrashon di e buelo inougural di Jetair Caribbean su ruta nobo Kòrsou – Jamaica. E buelo inougural aki ta marka inisio di e di 4 destinashon di e aerolínea. Durante e resepshon a hiba palabra, Minister di Desaroyo Ekonómiko, sra. Ruthmilda Larmonie – Cecilia, Minister di Tráfiko, Transporte i Planifikashon Urbano, sr. Charles Cooper, Managing Director di Jetair Caribbean sr. Antonio Ribeiro, CEO di Jetair Caribbean sr. Robert Maas, Director of Air Service Marketing & Development na Kuraçao Airport Partners sra. Peggi Croes, Managing Director di Kuraçao Hospitality & Tourism Association sra. Maria-Helena Seferina-Rojas.

E ruta nobo di Jetair ta hasi posibel pa mas turista for di Jamaica bin eksperensiá e produkto úniko ku Kòrsou ta brinda. Nos plaianan bunita, kultura riku, historia, arkitektura, variedat di atrakshonnan turístiko i mas ku tur kos nos hendenan amabel. Na mes momentu e ruta aki ta brinda tambe mas opshon di biahe pa nos pueblo lokal.

E buelo aki di Jetair lo ta riba djaweps. E buelonan ta keda efektuá ku un Fokker 70 ku un kapasidat di 80 stul. E aerolínea su meta ta pa sigui amplia nan skema di buelo ku rutanan for di Karibe i Sur Amérika.