Un biaha mas caso contra Rudy Carti posponi y awor te cu september

Un biaha mas e caso penal contra e fisioterapista Rudy Carti a wordo posponi. E biaha aki te cu luna di september. Carti ta deteni for di aña pasa na momento cu un denuncia a drenta contra dje pa actonan contra moralidad cometi cu un pashent di dje, cu ta haci e situacion pio. 

A pone tratamento di e caso pa dia 25 di juni, net dia di eleccion. E pensamento ta cu e tratamento lo sigui y lo dura rond di 2 ora pa cual a trece e acusado Corte e biaha ey si. Sinembargo tabatin buelta nobo den e caso y na final e tratamento no a sigui.

A resulta cu defensa di Carti a haci peticion pa scucha algún testigo, riba peticion di su cliente. Prome Hues mester a check pensamento di Fiscal si e tabata di acuerdo pa scucha e testigonan y na mesun momento mr. Carlo a pidi tambe pa pospone tratamento di e caso pa motibo cu dos ora no ta suficiente pa su cliente defende su mes di e acusacionnan serio cu tin contra dje.

Fiscal no tabata di acuerdo pa motibo cu anteriormente tabatin un regiezitting unda por a haci peticion di loke defensa of Ministerio Publico tabata kier adicional prome cu tratamento di e caso. No a menciona nada di e asunto aki ni cu e cantidad di tempo poni no ta suficiente. Ademas, el a bisa, no ta mira sentido pa scucha testigonan cu no tabata presente durante cu e victimanan ta bisa cu e hechonan a tuma lugar.

Aunke Fiscal a bisa di no ta mira necesidad pa scucha e testigonan, Hues a permiti haci pregunta n’e testigonan, pero e mester tabata preguntanan cu ta relaciona cu e sucedido. Esaki a corta den e pregunta cu e defensa tabatin di haci. A scucha casa di e acusado, pero mucho e no por a bisa, pasobra e no tabata presente nunca durante cu su casa tabata trata un pashent.

Tambe a scucha dos pashent di Carti y tabata kier sa di nan con e tratamentonan tabata tuma lugar y si e mannan a yega di yega mucho leu. Un di nan a bisa cu su casa tambe tabata presente ora di e tratamento.

E acusacionnan ta amplio y ta cuminsa for di aña 2012 bin ariba. Ta parce cu ora un a cuminsa papia, mas otro cliente a cuminsa basha’bou di cosnan indebido cu tabata sosode, pero cu no a haci e denuncia anteriormente pa miedo y berguensa. E acusacionnan ta bini di denuncia haci dor di 8 pashent y ta di abuso sexual of acto di inmoralidad.

Na inicio di e caso, ora cu a pidi pa pospone e tratamento, Hues a mustra Carti cu anteriormente el a nenga di contesta pregunta di Recherchenan y e tabata kier sa si awor e lo bay papia. El a splica si cu e motibo pakico e no a papia ta pa motibo cu e Recherchenan no tabata permiti pa su abogado ta presente. Hues a puntr’e si e lo papia si e abogado ta presente, cu el a contesta afirmativamente.

Otro problema p’e defensa tabata e caso di labamento di placa. Por corda cu a confisca un suma di placa efectivo (basta) na cas di Carti. A resulta cu Ministerio Publico a separa e dos casonan, algo cu defensa no tabata di acuerdo cu ne, pa motibonan practico.

Mr. Carlo a keda sorprendi ora cu Fiscal a bisa cu no ta conocí si tin un caso penal ainda pa loke t’e placa confisca. “Anto duna mi cliente su placa bek. Esey ta loke el a spaar henter su bida pa ora cu e bay cu pensioen,” e abogado a splica Corte. 

Na final a keda palabra cu mester yega na un fecha pa funcionarionan di KZP interoga Carti. Como reces ta bay drenta, a pone tratamento di e caso te pa dia 17 di september. Mientrastanto, e ta keda sera.