Gabinete Pisas ta ratifiká Landspaketten i aseptá COHO!

WILLEMSTAD – Ku sintimentu miksto, frakshon di PAR a tuma nota di e karta di Minister di Finansa sr. Silvania di dia 28 di yüni  2021 i tambe splikashon di su persona i di Promé Minister Pisas durante e reunion públiko di Parlamento di dia promé di yüli último.

E reunion ariba menshoná, a tuma lugar riba petishon di Minister Silvania, ku a urgi Parlamento den su karta di 28 di yüni , pa trata e leinan di rekorte salarial di Minister- i Parlamentarionan ku urgensia promé ku 1 di yüli 2021.

Minister di Finansa Sr Silvania, tantu den den su karta, komo durante e reunion, a konfirmá na Parlamento ku Gabinete Pisas den Konseho di Minister dia 30 di yüni  último, a ratifiká e akuerdo Politiko será entre Gabinete Rhuggenaath i Gobièrnu di Hulanda (pa medio di Sekretario di Estado Raymond Knops) dia 2 di nòvember 2020.

Komo tal, Gabinete Pisas a ratifiká e Landspaketten i tambe a aseptá pa negosiá  COHO. Tur esaki a base di un akuerdo entre Gabinete Pisas i Sekretario di Estado Raymond Knops.