Rocco Tjon, líder di fracción di MEP: Hulanda ta bay di acuerdo pa Aruba wordo incorpora den programa di ayudo di Union Europeo

Diahuebs ultimo, dia 7 di maart e delegacion Arubano di Parlamento tabatin un reunion cu Minister di Asunto Exterior di Reino Hulandes, sr. Stef Blok. Durante e reunion aki sr. Blok a duna di conoce cu e ta bay di acuerdo pa Aruba por wordo incorpora den e programa di Union Europeo pa cu ayudo p’e problematica di refugiado for di Venezuela.
Obviamente Hulanda kier tuma nota di e plan di crisis pa atende cu e situacion aki.

E programa aki ta ofrece e.o. sosten financiero na paisnan cu ta enfrenta problemanan debi n’e crisis di refugiado for di Venezuela.
Hulanda a priminti Aruba te cu aworaki solamente asistencia tecnico pa cu refugio di personanan cu ta bin for di Venezuela y tambe e procedura cu esaki ta bin cune.
E crisis di refugiado aki ta costa Aruba hopi placa y p’esey Presidente di Parlamento di Aruba, mr. Ady Thijsen conhuntamente cu Presidente di Parlamento di Corsou, a sinti e necesidad pa pidi ayudo na Union Europeo.

REUNION NA BRUSELAS
Dialuna 11 di maart awor, e delegacion di Aruba lo ta na Bruselas pa reuni cu Embahada Hulandes, e Comision Europeo y tambe cu European External Action Service (EEAS) cu ta sostene paisnan cu problematica di refugiado.

PA CONCLUI
E reunion cu sr. Stef Blok a bay sumamente bon y un di e rekisitonan pa por wordo incorpora den e programa di ayudo a wordo cumpli cune.
Hulanda a bay di acuerdo pa Aruba por wordo incorpora, pero obviamente sr. Stef Blok a duna di conoce cu Hulanda kier tuma nota di e plan di crisis pa atende cu e problematica aki tambe a corto plazo.

Top